الرئيسية / أخبار مصر / ((الجو الشعبي الاصيل بيت الحبايب ..متابعه// هشام ابوزيد))

((الجو الشعبي الاصيل بيت الحبايب ..متابعه// هشام ابوزيد))

الجو الشعبي الاصيل
بيت الحبايب

القهوة البلدي

يسألني كثيرون، لماذا أحب القهاوي البلدي عن تلك المسماة بالـ “كافيهات”..

هاكم الأسباب:

-القهوة البلدي بنحس فيها بدفء أسري زي اللي بنحسه ف البيت لما تكون انت و قرايبك متجمعين يوم العيد الكبير حوالين صينية فتة و شوية لحمة عدالة و كتير..

-تقدر تدخل القهوة البلدي ف أي وقت مع أي حد و أي عدد من غير ماتتعرض لأسئلة و جمل خبرية سخيفة من نوعية:
كام شخص معانا انهاردة يا فندم؟
حضرتك في مينيمام شارچ ١٠٠ جنيه للشخص يا فندم
آسف جدا الـ table دي محجوزة يا فندم
تحبوا تقعدوا فوق ولا تحت يا فندم؟
سوري يا فندم اخر اوردر!
و اصلا مش هتسمع كلمة “يا فندم” الـ**** دي خالص!

-القهوة البلدي مش محتاجة أي ميزانية او تحويش او اي نوع من انواع القلق المالي خالص.. لو ف جيبك ١٠ جنيه عادي جداا هتقعد و تطلب و تتبسط..

-تقدر تدي مواعيد غير مسبقة على القهوة البلدي.. ازاي؟
بمجرد ما تدخل، هتلاقي سيد بيقولك: وائل قاعد جوة.. او: حسام لسه مجاش..
سيد حافظنا كلنا و عارف كل واحد فينا جدوله ايه بدقة..

-ازازة المية المعدنية السخيفة امو ١٥ جنيه مش هتتحط قدامك عافية زي التهريج اللي بيحصل ف الكافيهات.. لو عوزت مية هتجيلك ببلاش ف كوباية أزاز زي مخاليق ربنا عادي

-مفيش منيو.. و دي شيء في منتهى الحميمية.. لان اول ما تقعد، هتلاقي سيد جايب المشروب المناسب لمزاجك كأنه أمك او مراتك..

-القهوة البلدي مفيش فيها بنات ولا ستات.. و دي ميزة نفسية عالية لعقلنا الباطن لأن بصورة لاإرادية هتلاقي نفسك بتتكلم و تتفك مع اصحابك ف الكلام براحتك

-ميزة كمان لعدم وجود بنات ف القهاوي البلدي، انك هتترحم من مناظر الحبيبة المسبلين و المسبلات اللي بيزحلقوا الأرضيات بتاعت الكافيهات محن و سهوكة..

-الميزة التالتة لعدم وجود بنات هي انك مستحيل تلاقي حد تافه بيحتفل بعيد ميلاده ع القهوة و تلوث سمعك و بصرك بالمجاملات السمجة اللي من تحت الضرس و أشكال الدباديب و البلالين المستفزة..
(و نقدر نضم احتفالات الفالانتاين المثيرة للغثيان تحت النقطة دي)

-لو حبيت تدفع تيبس ع القهوة، ممكن تدفع جنيه مصري واحد فقط و انت راسك مرفوعة عادي.. و سيد هيشكرك بحرارة كأنك اتبرعتله بحتة من كبدك..

-ع القهوة البلدي محدش هيسخف عليك و يجي يقولك سوري يا فندم ممنوع اي مأكولات او مشروبات من برة.. و بصفة عامة مفيش ممنوعات من اي نوع ع القهوة..

-طب لو جعان او جعت و انت قاعد و حبيت تاكل اي حاجة من اي حتة ف اي وقت؟
عادي هتبعت سيد يجيبلك اي حاجة من اي حتة من غير ما يتنح معاك ف تيبس زيادة..

-القهوة البلدي مكان رائع و آمن و حميمي لاجتماعات الاصدقاء من غير ماتسمع تقطيم من امك او مراتك

-القهوة البلدي مش بتقفل.. محدش هيجي يقومك من عليها ابدا..

-لو مزاجك عنب و قررت تتجنن و تحاسب انت لكل اصحابك مش لازم تبيع كلية من كلاويك.. أقصى مبلغ هتدفعه أيا كان عدد اصحابك و مشاريبهم، مش هيزيد عن ٦٠ جنيه.. و ممكن تدفع قسط..

-وسائل التسلية المصرية الأصيلة كلها متوفرة ع القهوة و على بعد ندهة واحدة لسيد..

-سيد بيوفرلك خدمة اخصائي نفسي لما تكون متضايق او بتمر بفترة مش لطيفة ف حياتك.. هيسمعك بمنتهى الإخلاص للاخر و هيحافظ على سرك و هيديك نصيحة متجربة و غالبا هتطلع صح، وكل ده included مع حساب المشاريب..

-لو نسيت اي حاجة تخصك ع القهوة، و غبت مهما غبت، هترجع تلاقيها مع سيد.. و في أوقات بتلاقي حاجات ضاعت منك ف أماكن تانية مع سيد بردو و ماتسالنيش ازاي..

-القهوة البلدي مكان يساع الغني و الفقير.. الكبير و الصغير.. الغريب و القريب..

شاهد أيضاً

((ابتسامه من تحت المطر..متابعه// هبه العيسوى))

((ابتسامه من تحت المطر)) ضحكه مصر 🇪🇬✌😍 ابتسامه من تحت المطر من خير اجناد الارض …

((أعراض غضروف الرقبه..كتبته د// نيره صلاح فايد))

>>أعراض غضروف الرقبة<< •ألم وتصلب في الرقبة. •ألم خفيف مزمن حول الرقبة و احيانا الكتف. …

((مناجاه..جيهان عثمان *زرقاء اليمامة *))

مناجاة ماعرفت الحب إلا حبى لك يا الله …. ماعرفت الهوى إلا هواك يا الله …

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

wholesale nfl jerseys nike 
Justin Faulk Jersey